Ник килмисең?

Нәрсә булды быел җәйгә? Күз тидерде әйтче кемнәр? Елак көзгә охшап калды, Көтмәгәндә җәйге көннәр. Өстән төшми җылы кием, Кояшның кызуы качкан. М иһырбанлы булчы, җәем, Күңелкәең әллә таштан? Көнгә ничә тапкыр килеп, Яңгырларың китә коеп. Эссе җәйләр көтә күңел, Кояш һәрчак торган көлеп. Ураганнар, торнадалар Җимерә шәһәр, авылларны. Булмый иде элек бер дә, Мондый мәхшәр давылларың. Көйсез килен кебек, җәем Кыланасың быел бигрәк. Кыланмышың кырга сыймый Нәрсә җитми, әйт ни кирәк? Син икенче бер тарафка, Адаштыңмы әллә китеп? Җәйнең уртасы җитә бит, Арыдык килүеңне көтеп. Сабантуйлар үтми калды Билгеләнгән үз көнендә. Усал бием кебек нигә, Халкым хисеннән көләргә? Күке күптән кычкырса да, Су коенган юк бит бер дә. Кызынган юк кайнар комда, Йөзә- чума елга- күлгә. Ник килмисең әйтче, җәем? Тидеме соң яман күзләр? Җәйдә көзге көннәреңә, Күңел тагын күпме түзәр?