Статья "Встреча с чемпионами Миланой Дадашевой и Камалом Абдужамаловым"

Шат ёлугъув.

Оьтемиш юртну айтылгъан спортсменлери Абдужамалов Камалутдин ва Дадашева Милана булангъы ёлугъув.

Арив болмагъа сюйсенг - чап,

Гьакъыллы болмагъа сюйсен г- чап,

Савлугъунг болгъанны сюйсенг - чап! – деген сёзлер терен маъна англата.

Ярышлар (спорт) адамланы бирикдире, ругьландыра, арив ишлеге талпындыра.

Оьтемиш юрт - бырынгъы юртланы бириси. Оьтемишде алдагъы заманларда уллу ярышлар , гиччи ярышлар оьтгериле эди. Юртну уланлары ат чапдырма, атны уьстюнде гьар тюрлю гьюнерлер этмеге, окъ атмагъа, тюбек булан атышмагъа уьйрене болгъан. Шо йылларда юртда уллу базар бола эди деп эсгере бола уллулар. Шонда башгъа юртлардан да кочаплар геле болгъан. Тутушуп ябушув, таш атыв ва башгъа тюрлю оюнлар оьтгерилген.

Гьалиги заманда да спортгъа кёп тергев бериле. Башгъа юртларда йимик бизин юртда да спортзал болгъан буса, уьстюнлюклеге етишмеге болажакъ эдик.бизин уланлар Тюмень якъларда яхшы уьстюнлюклеге етишгенлер. Шоланы арасында Европада оьтгерилген самбо, борьба ябушувларда оьр канзилеге етишмеге болгъанлар.

Муслимов Артур Казимагомедович, Сонгуров Батыр Халикович, Умалатов Казимагомед Умалатович…

Бугюн ( 26 ноябрь 2016 й. ) буса бу йыл дюнья чемпионатында экинчи ерни алгъан Абдужамалов Камалутд ин ва Олимпия оюнланы ортакъчысы Милана Дадашева булан ёлукъмагъа жыйылгъанбыз.

Бу батыр уланны тарбиялагъан тренери Гулагаев Абдурахман Умарович. Булар Оьтемиш юртну, районну жамиятын сююндюрдю. Камал оьрюм яшланы арасында тутушувдан Тбилиси шагьарда дюньяда биринчилик алмакъ учун оьтгерилген ярышларда экинчи ерни алма болду. Абдужамалов Камалутдин экинчи ерге чыкъгъаны - уллу гьюнер ( 76 кило авурлугъунда ол алты керен ябушгъан ва уьст гелген.

Жыйынны ачгъан ва юрютген школаны директору Магомедов М.А. чемпионлагъа кёп арив сёзлер айтды, гележекде олагъа уьстюнлюклер ва савлукъ ёрады.

Булар этген иш – бизин школадагъы яшлагъа арив уьлгю болуп токътагъанны эсгерди.

Абдужамалов Камалутдин ва Милана Дадашева , къыз да, улан да, янгыз Оьтемишни тюгюл, савлай районну, Республиканы оьктемлиги, -деп тамамлады сёйлевюн Магомедов М.А.

Чыгъып сёйлегенлер: тренери Гулагаев А.У., муаллими, кёп сюеген Камалны учители – Гаджиева М. А. Камалгъа багъышлап арив сёзлер айтдылар. Сонг Хасаев З.К., яшланы арасындан Исаев Азамат, Иджиев Хабиб и Кадиев Динислам ёлдашларыны атындан спортсменлеге исси сёзлер айтды ва уьстюнлюклер ёрады.

Гележекде бу жагьиллеге дагъы да уьстюнлюклер ёрайбыз ва уллу спортда « Яхшы ёл !» - деп айтабыз.

Камал, алгъышлайбыз ёлунгну!

Тарихлени бетлеринде гёребиз,

Гьар заманда уьстюн гелген Оьтемиш.

Ата юртну уланлары бар туруп,

Не яндан да уьстюнлюкге етербиз.

Яшлай тутуп, мурадына етишген,

Уланланы арасында тириси.

Ата юртун белгилеген, оьр этген

Батыр улан – Камал деген бириси.

Минг макътавлар булай батыр улангъа

Уьстюнлюкден уьстюнлюкге етишген.

Уьстюн гелип, оьр канзиге мингенсен,

Кюллю халкъы дюньядагъы эшитген.

Оьрлюклеге етер йимик дагъы да

Юрт яшлагъа сенден уьлгю салынсын.

Камал, сени алгъышлайбыз ёлунгну,

Атынг сени сав дюньягъа айтылсын!

Милана Дадашева буссагьатгъы вакътиде Магьачкъала шагьарда яшай. Ол къатынланы арасында тутушуп ябушувну устасы. Милана Бразилияда РИО - де-Жанейро шагьарда оьтген Олимпия оюнланы ортакъчысы.

Милана Дадашева кёп санавдагъы международный турнирлени ортакъчысы, Россияны чемпиону.

Гележекде Милана Токиода болажакъ олимпия оюнланы утажакъ деп умут этебиз.

Атынг алтын булан язылсын!

Юреклеге шончакъы да ювукъсан,

Ата юртда оьсмесенг де, Милана.

Къумугъумну ата юртун оьр этген,

Сююнебиз сендей къызы барына.

Гьаракатынг башгъа чыкъсын, Милана,

Атынг сени сав дюньягъа айтылсын.

Эркеклердей тогъа тартгъан къызъяш деп,

Асил атынг алтын булан язылсын.

Сен гелгенде гюнеш чыкъды, гюн чыкъды,

Яшнап къалды авлакълары, къырлары.

Ата юртну аты бир де сёнмежек

Барлыгъына сени йимик къызлары!

Спортсменлеге багъышлангъан концерт герсетилди, яшланы гьазирлеген муаллимлер Исаева М.Х., Исаева Э.Х.