Нысащ1э япэу псыхьэ зэрашэр

Езыгъэк1уэк1ыр: Адыгэ хабзэу бзыпхъэ дахащэ!

Зэман блэк1ахэм уэ урафащэщ,

Ди нэхъыжьыф1хэм урафэеплъщ.

Нобэ ди щ1эблэм уриуэрэдщ.

Уэ упсэунщ адыгэр щы1эхук1э

Уэ ущы1эхук1и адыгэр псэунщ.

Къэбэрдейм и зы адыгэ хабзэхэм ящыщщ «Нысащ1э япэу псыхьэ зэрашэр».

Аращи Дзэлыкъуэкъуажэ япэ сабий садым къабгъэдэк1ыу дэ нобэ фэдгъэлъагъунщ ди адыгэбзэ, ди хабзэ дахэм теухуа пычыгъуэ.

Гуащэ: А нысэ фыхьэзыр?

Нысэ: Дыхьэзырщ нанэ,нысащ1эми 1эджэ къыдитащ.

Еплъыт , мыхэр абы ищ1ащ.

Гуащэ: Тобэ, и 1эм дыщэ къыпощри.

Сыту дэхащэ!

Нысэ: Ар зырик1щ, нанэ. Модэ абы зы арджэн ц1ык1у, еухыжри нак1уэт,

Уезгъэплъынти. (Мак1уэри къуоплъ).

Гуащэ: Сыунащ! Дыщэр и 1эпэм къыпощ къэтша ц1ык1ум.

Аллыхьым и шыкурщ.

Нысэ: Нанэ, ди гъунэгъу фызхэри къэсащ. К1уэ абыхэм деж.

Дэ дежьэнщ. Месс щ1алэгъуалэр къыдохьэ.

(Пшынауэ макъ къуо1у)

(пхъэхрэ пэгунит1рэ къыщ1ех. Нысащ1эр къыщ1ешри, абы ирет. Езым матэ къещтэри йожьэхэ).

Псоми: Нобэ ди нысащ1эр псыхьэ япэу дошэ.

Ялыхь зэрыжылэу тхуэф1ын щ1ы.

Тхьэм жи1э!

(пшынэ еуэу, джэгуу здэк1уэм зы фызыжь къахуозэ).

Нысэ: Уи махуэ ф1ыуэ, Жэнгуащэ!

Жэнгуащэ: Махуэф1 тхьэм къывит!

Дэнэ фежьа?

Нысэ: Ди нысащ1эр япэу псыхьэ дошэ. Мэ абы ищ1ауэ мы чысэр удот.

Жэнгуащэ: Фи 1ыхьэр к1ыхь ухъу!

(Псори йожьэж. Занщ1эу къуоувы1эж)

(Макъ зы-т1ущ)

Зэ-зэ, Мурат сымэ къуох. Фыкъэувы1э.

Псоми: Уи махуэ ф1ыуэ, Мурат!

Дауэ фыщытхэ?

Мурат: Тхьэр ф1ык1э къыфщ1эупщ1э.

Нысэ: Мурат, ди нысэр нобэ япэу псыхьэ дошэ.

Абы ищ1ауэ мыр узот.

Мурат: Тхьэр аразы къыфхухъу.

Мы нобэ къефшэжьа нысащ1эр

Нысащ1э щ1ык1аф1эу

«1уоху щ1эн» жа1эм къэжану,

Дадэ жи1эм еда1уэу

Нанэ жи1эр и гуапэу

Пэрытыныр и хьэлу

Илъэсыщ1э къыиугъащ1э!

Псоми: Аллыхьым жи1э.

(йожьэж, бгыщхьэм нос)

(Нысащ1эр псыхъуэм дохьэ. Пэгунхэр егъэув.)

Нысащ1эм: Нобэ Хьэтэжьыкъуэхэ я лъапсэ сыкъик1ри, япэу псыхьэ сыкъэк1уащ. Мыр уи 1ыхьэщ.

(Пэгуным илъыр кърехри егъэт1ылъ)

Бгыщхьэм тетхэм: Феплъыт, феплъыт жыхъуэ гуащэм и 1ыхьэри къихьащ.

(Нысащ1эм псы кърегъахъуэри, щ1алэ ц1ык1уит къуосри ирак1утыж).

Бгым тетхэм: Къэгубжьакъым, къэгубжьакъым.

( Аргуэру кърегъэхъуэжри, щ1алэ ц1ык1ухэр къыщыжэк1э ирак1утыну).

Нысащ1эм: зэ-зэ! Мэ мыр фызот.

(бэлътоку зэрыз къарет. Пэгунхэр къещтэжри бгым тетхэм ягъусэу къуок1уэж.)

Пщ1ант1эм фызыжьхэр дэсщ.

Нысэм: Феплъыт нысащ1эм къихьа псым.

(Щыми ираф)

Сыту 1эф1ыщэ!

Гуащэм: Мыр си нысэ ц1ык1ум къызэрихьара хъунщ апхуэдизу щ1ысф1э1эф1р.

Псым хуэдэу уаулъагъу, си хъыджэбз ц1ык1у.

Нысэм: Фэ фыщ1ыхьэ нанэ.

Дэ т1эк1у дыджэгунщ.

Адыгэ джэгу(сабийхэм ягъэзащ1э).

Джэгур яублэ. Бажэр къахуолъадэ.

Бажэм: Сыкъевгъэл! Сыкъевгъэл!

Гупым: Сыт къэхъуар бажэ ц1ык1у?

Бажэм: Адакъэм сыкъевгъэл. Сиук1ыну къуок1уэ.

Гуыпым: Уэ адакъэм уиук1ынуи? (Мэдыхьэшххэ).

Бажэм: Ар зэрыхъуам фыкъеда1уэ.

Адакъэ хахуэ

Тхьэк1умэк1ыхь,Мыщэ,Дыгъужь,мэкъуауэ къик1ыжу зы Адакъэжь.

Тхьэк1умэк1ыхьыр и унэр утык1ум итщ,езыр, вакъэнжей егъэщри,бжэщхьэ1ум тесщ.

Тхьэк1умэк1ыхьым: Вакъэнжейр гъэщын сыухмэ, си вакъэр здыжынщи, ди анэшым нысэ къашауэ жа1ащи, сык1уэнщ,сыкъыщыфэнщ,сыщыуджынщ(1эдакъэжьауэ ещ1ри маплъэ).Мы къак1уэр хэт? Бажэра хуэдэщ…Сытым къысхуихьу п1эрэ?

Бажэр къохьэ

Бажэм: Сыт ухуэдэ,си шыпхъушхуэ?

Тхьэк1умэк1ыхьым: Дыф1щ, тхьэр ф1ык1э къыпщ1эупщ1э…Къеблагъэ! «Хьэщ1эм насып къыдок1уэ» ,Бажэ ц1ык1у,удгъэхьэщ1энщ.

Бажэм: Деблэгъаи!

Тхьэк1умэк1ыхьым: Сытым укъытхуихьа?

Бажэм: Аслъэным унафэ ищ1ащ сэ тхьэк1умэк1ыхьым и унэм сыщ1эт1ысхьэн хуейуэ.

Тхьэк1умэк1ыхьым: «Хамэхьэр къуохьэри, унэхьэ иреху!» Сэ дэнэ сык1уэн ит1анэ?

Бажэм: Мэз щыхъук1э,уэри зы унафэ гуэр къыпхуащ1ынщ. Дэнэ ухуейми к1уэ,ухуейми губгъуэм ис-ар си мы1уэхущ. «Щ1ымахуэр къытк1эщ1эзэрыхьащ, Бажэм зы егъэзып1э гуэр имы1эу хънукъым»,- жари уи унэр къызатащ.

Тхьэк1умэк1ыхьым:Ар дауэ хъун,си шыпхъужь,сыт телъыджэлажьэ къызжеп1эр!(Магъ)

Бажэм: Алейк1и умыгъынанэ,унафэр унафэщ: инэрал щхьэ гъуанэм деж ук1уэу утхьэусыхами,зыри къыпхуащ1энукъым.

(Бажэр,унэм щ1охьэри, бжэ-щхьэгъубжэхэр кърегъэбыдэк1,дзапэ уэрэди къыхедзэ.Тхьэк1умэк1ыхьыр гъынанэу пщ1ант1эм къыдонэ.)

Тхьэк1умэк1ыхьым: Кхъа, сомыгъэунэхъу, си шыпхъу закъуэ!(Магъ).

Бажэм: Умыгъынанэ жыс1акъэкъэ! Узэгуэудами,сыныщ1эк1ынукъым,куэдщ уэ мыбы узэрыщ1эсар!

Тхьэк1уэк1ыхьым: Ул1эжынукъэ уэ?

Бажэм: Уи жьэр зэтеп1э! сыныщ1эк1мэ, ф1ы хэпхынкъым!

(тхьэк1умэк1ыхьыр гъыуэ бжэщхьэ1ум тот1ысхьэ. Мыщэр къыбгъэдохьэ).

Мыщэм: Мыр л1о,Тхьэк1умэк1ыхь ц1ык1у, хэт узыгъэгъар?

Тхьэк1уэк1ыхьым: Сэ иджыпсту бжес1эну къуажыхьыр къащ1и сызыгъэгъар къэпщ1энщ. «Зи к1эр зылъэф, зи фэр зи бий.

Мыщэм: 1эгъу ! Бажэр ара?

Тхьэк1уэк1ыхьым: Бажэр къак1уэри си унэр сф1иубыдащи, къысхущ1эк1ыжыркъым. Мес, уэрэд кърешри щ1эсщ.

Мыщэм: Мыдэ сэ абы сыхурикъункъхэ! (бжэм бгъэдохьэри тоу1уэ)

Ей напэншэ,мы тхьэмыщк1эм ф1эк1 узыщыхьэн бгъуэтыркъэ!

Бажэм: Л1о узыхуер?

Мыщэм: Къыщ1эк1 мы унэм.

Бажэм: Щыгугъ абы…

Мыщэм: Сыныщ1ыхьэнщи, уи фэр тесхынщ.

Бажэм:Уи фэр тесхынщ жып1а?! Зэ догуэ, мыдэ си вакъит1ыр щызгъэт1агъэ уэ: уэрэ сэрэ хэт и фэр трахми,деплъынщ!(1эуэлъауэ зещ1)

Мыщэм: (шынауэ къок1уэтыж). Къысхуэгъэгъу, Тхьэк1уэк1ыхь ц1ык1у,щ1ыхьэху сок1уэри соп1ащ1э.Нэхъ пщыхьэщхьэ1уэ хъумэ, къытезгъэзэнщ, си шыпхъу.

Бажэм: «И хьэсэпэ здынэс ищ1эжыркъым». Плъагъуркъэ а лъапэ нэфым и гугъэр! Уэри!(И дзапэ уэрэдым пещэ).

Тхьэк1уэк1ыхьым: Сыт мыгъуэр си махуэт.(гъынанэу къыщ1едзэж)

Дыгъужьым: Мыр сыт,узэщыджэу утыкум щхьэ уит?

Тхьэк1уэк1ыхьым: Бажэр къак1уэри си унэр ибыдащи, къысхущ1эк1ыжкъым.Щ1ымахуэр къэсащ, пщ1ант1эм сыкъыдэнакъэ Дыгъужьыжь…

Дыгъужьым: А нэжэсым ищ1ам еплъыт… Умыгъ, сэ къыщ1эсхужынщ.(Бжэм бгъэдохьэри тоу1уэ).

Ей, напэншэ, къыщ1эк1 мы унэм1!

Бажэм:Дауэ жып1а?

Дыгъужьым: Къыщ1эк1 ,зо, мы унэм! Гуэныхьщ мы пщ1ант1эм къыдэбна тхьэмыщк1эр. Сыныщ1ыхьэмэ, уи фэр тесхынщ.

Бажэм: Зэ умып1ащ1э. Мыдэ си к1агуэр щыст1эгъэнщи, сыныщ1эк1мэ, хэт и фэр трахми уэзгъэлъэгъунщ!

Дыгъужьым:(Тхьэк1умэк1ыхьым жри1эурэ) Фи1уэху дахэ ухъу,си шыпхъу ц1ык1у, сэ модэ тетыр къызэджащи, соп1ащ1э. Нэхъ пщыхьэщхьэ хъумэ, сыкъыплъыгъуэзэнщ.

Бажэм: Хьым! «И шык1э маф1э егъэуауэ». Сыныщ1эк1ыху, у1умык1ыжащэрэт: сабэр къыпхезгъэхынт! Уа, угъынанэу куэдрэ ущытыну мыбдей ?! Жылэр щхьэ зыщ1эбгъэстрэ?! Унэр сысейщ- зы1уегъэх адэ!

Тхьэк1уэк1ыхьым: Сыт мыгъуэр си махуэ…

Адакъэм: Сыт къэхъуар,щхьэ угърэ?

Тхьэк1уэк1ыхьым: Дауэ сымыгъынрэ: Бажэр къак1уэри си унэр иубыдащи,къысхущ1эк1ыжкъым.

Адакъэм: Нт1э ар 1уэху. Сыт абы щхьэк1э ущ1эгъыр? Сэ абы и нэвагъуэр езгъэлъэгъужынщ.Мэкъу еуэным си гур щ1ихащи, а Бажэ жыхуэп1эр езыр шэджэгъуашхэ хъарзынэ схуэхъунущ.(Бжэм тоу1уэ) Хэт мыбы щ1эсыр?

Бажэм: Сэращ…

Адакъэм: Уэ ухэт?

Бажэм: Сэращ… Бажэращ…

Адакъэм: Еплъыт мыр здэщы1эм. Лэпс тепхъэ усщ1ыну нобэ лъандэм сыплъохъуэри узгъуэтыркъым.Къыщ1эк1 мыдэ!

Бажэм: Иджыпсту …

Адакъэм: Къыщ1эк1 жыс1акъэ!

Бажэм: Си вакъэр щызот1агъэ…

Адакъэм: Куэдрэ дызэригъэжьэну мыбы!

Бажэм: Си к1агуэр щызот1эгъэжри аращ…

Адакъэм: Вакъэ,к1агуэ жи1эу кудрэ дызыпигъэплъэну мыбы! Зэ умып1ащ1э уэ! Уи цыр пхуэзмыщмэ, сэ сы-Адакъэкъым!

Бажэм: Уэуэууууу мыгъуэ! (щхьэгъубжэмк1э къыдолъри йожьэж)

Адакъэм: «Е пщ1ауэ, ф1ы ущымыгугъ!» Уэри! Насып уи1эти,укъыс1эрыхьакъым.К1уэ, си шыпхъу ц1ык1у,щ1ыхьэж уи унэм.

Тхьэк1умэк1ыхьым:Тхьэр арэзы къыпхухъу, уэ къысхуэпщ1ар зэрысщыгъупщэн щы1экъым, неблагъэ, си 1энэр хьэзырщ!

Уэрэд «Адыгэ хабзэ»