Däp bolmadyk sapak konspekti

S.A.Nyýazow adyndaky etrabynyň

6-njy orta mekdebiniň

Başlangyç synp mugallymy

Zaýnab Halliýewanyň

“Geýinmegiň we egin-eşikleriňi arassa saklamagyň edebi..”

temasynda geçen däp bolmadyk synp

sagadynyň sapak

ÝAZGYSY

2021-2022-nji okuw ýyly

Senesi : 6.11.2021 Dersi:synp sagady Synpy: 1-nji “ B “

Sapagyň temasy: Geýinmegiň we egin-eşikleriňi arassa saklamagyň edebi.

Sapagyň maksady:

a)okuwçylara “Geýinmegiň we egin-eşikleriňi arassa saklamagyň edebi” diýen temadan gürrüň bermek, geýinmegiň edebi barada düşünje bermek.

b) ýaş nesillerde geýinmegiň edebini terbiýebermek;

c) ata Watana,zähmete söýgini terbiýelemek, sözleýiş dilini ösdürmek, dünýägaraýşyny giňeltmek.

Sapagyň abzallaşdyrylyşy: netbuklar, gazet-zurnallar, suratlar, slaýdlar.

Sapagyň görnüşi: söhbetdeşlik.

SAPAGYŇ GIDIŞI:

I. Guramaçylyk döwri: Synpy sapaga taýýarlamak.Okuwçylaryň gatnaşygyny hasaba almak.

II. Geçilen temany gaýtalamak: Salam berip salam almagyň edebi..

Salam adamlaryň birek-birege sataşanda, duşuşanda ilkinji aýdýan hoşamaý sözüdir. Ynsan gatnaşyklary şol sözden başlanýar. Essalawmaleýkim arap sözi bolup, ol dilimize terjime edilende «Size parahatlyk isleýärin» diýen manyny berýär.

III. Geçilen temany jemlemek:

Biziň ýurdumyz nähili ýurt boldy?

Garaşsyzlyk bize näme berdi?

IY. Täze temany düşündirmek: Howa ýagdaýyna görä geýinmek.Egin-eşige we aýakgaba ideg etmek.

Adamlar ýylyň paslyna görä geýinmeli. Käbir çagalar ýylyň dowamynda ýyly ýer-

lerde ýaşaýarlar. Şoňa görä-de, ýeňil egin-eşik geýýärler. Käbir çagalaryň ýaşaýan

ýerinde howa üýtgäp durýar. Şonuň üçin hem ýylyň paslyna laýyk geýinmek gerek.

Kesellemezlik üçin, geýýän eşigiňe üns bermeli.

Aýakgap şikes ýetmelerden, sowuklamadan goraýar. Aýakgap lar howa şertlerine görä, dürli derilerden tikilýär. Her pasylda geýmeli aýakgaplar bar: gyşda – ýyly ädikler ýa-da ýapyk aýakgap lar, tomsuna açyk, ýeňil aýakgaplar geýilýär.

Biz egin-eşigimizi we aýakgabymyzy barjak ýerimize görä geýinmilidiris. Teatra,

muzeýe, myhmançylyga ýa-da toýa sport eşiginde we sport aýakgabynda baryp bilmeris. Owadan lybasly hem biz stadiona ýa-da howluda oýun oýnamaga çykyp bilmeris.Şeýlelikde, geýinmegiň hem öz medeniýeti bar. Biz barýan ýerimize laýyk geýinmeli.

Çaganyň geýimi we aýakgaby çyg bolsa, ol aňsat näsaglap bilýär. Gezelenje çykmankaňyz, ululardan aýagyňyza näme geýmelidigini soramagy ýadyňyzdan çykarmaň. Egin-eşigiňi we aýakgabyňy ýylyň paslyna görä geýmeli.

Y Temany berkitmek: Sorag-jogap alyşmak.

1. Lybasyň we aýakgabyň elmydama arassa bolsun.

2. Egin-eşigiň arassa we daşky görnüşi owadan bolsun.

3. Howa şertlerine laýyk geýniň.

4. Täze eşikler we aýakgap bilen hereketli oýunlary oýnamaň.

5. Aýakgaby aýagyň ölçegine görä geýiň.

6. Başga adamlaryň egin-eşigini we aýakgabyny geýmäň, deri keseliniň döremegine

getirer.

7. Aýagyň derlemez we yslanmaz ýaly, aýakgaby käwagtlar arassa howada saklaň.

8. Zaýalanan aýakgaby wagtynda bejerdiň.

9. Pasyl çalşanda aýakgaby arassalap, gaplara salyp goýuň.

10. Çagalaryň egin-eşiklerini we aýakgaplaryny ulularyňkydan aýratyn ýerde saklamalyTapmaça:

1. Gündiz – ýolda,

Gije – öýde,

Iki dogan

Hemişe bile.

2. Dyz boýy çukurjyk.

VI Öý işini tabşyrmak: Mekdep lybasy barada aýdyp beriň. Maslahatlary okaň we ýadyňyzda saklaň.

VII.Sapagy jemlemek: A) Okuwçylary bahalandyrmak. b) Sapagy jemlemek.

Mugallym: ___________ Z.Halliýewa

Seredildi:MMTIBO: _________ U.Atajanow