Давыдов Пётр Владимирович,
учитель удмуртского языка высшей квалификационной категории
МБОУ «Юськинская СОШ» Завьяловского района Удмуртской Республики.
Тема: АНТОНИМЪЁСЛЭН ПАЙМЫМОН ДУННЕЯЗЫ
(Удмуртский язык, 5 класс)
Уроклэн азьмугъёсыз:
антонимъёс сярысь валан сётоно, соосты шедьтыны, шонер кутыны дышетоно, компьютер технологиез уже кутон быгатонлыкез азинтоно, группаын ужан амалъёсъя ог-огдэ гажан мылкыд пыӵатоно, визькылъёс пыр ӟеч сямъёслы дышетоно, удмурт кылэн тунсыкъяськон мылкыд пыӵатоно.
Уроклы ужтӥрлык: интерактивной доска, ноутбук, мультимедийной проектор, презентация, карточкаос, учебник.
Личностной результатъёс: ортчоно темая мылкыдзэс шараяло, дунъяны дышетско.
Метапредметной результатъёс:
Регулятивной УУД: дышетӥсен ӵош азьмугъёс пукто, тодэмзэс возьмато, ужамзылы дунъет сёто.
Познавательной УУД: юанъёс бордын ужало, кулэ ивортодэт утчало, тодэмзэс радъяло, йылпумъянъёс лэсьто.
Коммуникативной УУД: дышетӥсен кусып тупатыны быгатон, малпанъёссэс шара верало, туркымъёсын но кузъёсын ог-огзэс валаса, кенешыса ужало, ог-огзэсты сак кылзо.
Предметной результатъёс: антонимъёсты шонер лыдӟыны но гожъяны быгато, текстъёсты но предложениосты сэртто-пертчо, антонимъёсты кузъяло, эскеро, тодон-валанзэс муромыто.
Уроклэн мынэмез
Темаез валэктон
Чеберлыко литератураын, огшоры вераськонын, публицистикаын паськыт кутӥсько антонимъёс. Антонимъёсты ӟеч тодон юрттэ кылэз узырмытыны, вольыт но чебер вераськыны, пӧртэм предметъёсты, действиосты, тодметъёсты син шоры пуксьымон, сюлме пыӵамон возьматыны, вунонтэм карыны.
Кылдэмезъя «антоним» кыл греческой луэ, пӧрмемын со кык люкетлэсь:
- «анти» - пумит луись шуэм луэ;
- «онома» - ним шуэмез возьматэ.
Озьыен, пуштроссыя ог-огзылы пумит луись кылъёсты антонимъёс шуо.
Темаез вунонтэм но син азе пуктымон карон понна, веранмес компьютер пыр бичам яркыт суредъёс-примеръёс вылын валэктом-эскером (экран вылысь кӧня ке суредъёсты учкыны ӵектӥсько).
Антонимъёс тужгес но трос кутӥсько фольклор произведениосын, выжыкылъёсын, кырӟанъёсын но такмакъёсын. Кылсярысь, одӥгаз асьмелы тодмо луись выжыкылын вань таӵе чуръёсыз (азьланьто компьютерен ужанэз):
Одӥг пересьлэн куинь пиез вылэм: бадӟымез Иван, шоретӥез Павол, покчиез Петыр. Ӝуждалаен пӧртэмесь вылӥллям та вынъёс: Иван ӝужыт, Павол шоро-куспо, Петыр лапег…
Кема-а, ӧжыт-а мынӥллям, вуиллям соос бадӟым гурезь доры…
Синйылтӥськоды-а пумит луись кылъёссэ? Соку пусъе соосты.
Озьы ас интыяз пыртэм антонимъёс вераськон кылэз лэчыт, яркыт но вунонтэм каро. Соос луыны быгато вань вераськон люкетъёс, но соосты уг кылдыто числительнойёс, союзъёс но частицаос: вить, куать, но, ке, гинэ…, озьы ик аснимез возьматӥсь кылъёс: Таня, Коля, Алнаш, Ижкар…
Темаез юнматон бордын ужан
Компьютер монитор вылэ сётэм ӟуч кылъёсты, удмурт кылэ берыктыса, антонимъёсын герӟано. Кин ӝоггес? (ужало группаос).
а) Трудолюбивый
б) Бесстрашный
в) Бедный
г) Злой
д) Жадный
ужась – азьтэм
кышкасьтэм – кышкась
куанер – узыр
лек – лякыт
кӧттырмостэм - шырыт
Кыӵе удмурт выжыкылъёсысь геройёсты та кылъёсын дунъяны луысал?
а) «Ачиз корась тӥр» калык выжыкылын: Петыр но солэн агайёсыз.
б) В.Садовниковлэн «Туганай но Зара»: Туганай но солэн вынъёсыз.
в) И.Гавриловлэн «Эктытӥсь пастух»: пастух, солдат но купец.
г) В.Садовниковлэн «Туганай но Зара»: Пери но Зара.
д) К.Гердлэн «Гондыръёс»: пересь кышно но беризь.
Нош таиз шудон-ӵошатсконамы пумит луись кылъёс ог-огзэсты ыштӥллям, йыромиллям. Утчано-бичано соосты, кузэн радъяно (интерактивной доска, презентация).
Точкаос интые пыртоно пословицаослэн пуштроссылы тупась кылъёсты. Антонимъёссэ одӥг гожен тодмостэ (интерактивной доска, презентация):
Туннэ лэсьтоно уждэ … эн кельты. (ӵуказелы)
Пиналысен ӧд ке дышетскы, … уд дышы ни. (пересьмыса)
Нодтэмез даллаше, …огкылысь кариськыны тырше. (визьмоез)
Бадӟым визьлы … йырын но ӟоскыт уг лу. (пичи)
Визьмо муртлэн – йырпыдсаз, … муртлэн кыл йылаз. (визьтэм)
Йырыз вылӥын но, валанэз … (улӥын)
Пыдыныд йырдэ эн нуллы, … пыддэ нуллы. (йырыныд)
Меми кылыныз тышкаське, сюлмыныз … (яратэ)
Ӟеч пиез – атаезлы шумпотон, уродэз … (куректон)
Тӧдьы вылэ … усиз ке, уд быдты. (сьӧд)
Уж: Валэктэ нырысетӥ но берпуметӥ пословицаослэсь значенизэс. Ма вераны тырше калык со сярысь?
Нош табере ойдолэ ай чаклаломы, кин ӝоггес йылпумъялоз пословицаослэсь кыкетӥ люкетсэс.
1)Толлозэ тодытэк …
2)Эшен секыт уж но …
3)Выль эш шедьтӥд ке но …
4)Эшедлы урод лэсьтыса …
5)Вакчи нунал но …
6)Туннэ ке пӧяд …
7)Кылыз лэчыт …
8)Визьмо мурт дышетскоз…
В.(туннэзэ уд тоды)
Ж.(капчи потэ)
Д.(вужзэ эн вунэты)
З.(солэсь тыныд умой каремзэ эн возьма)
Б.(ужтэк кузь потэ)
Г.(чуказе уз оске ни)
Е.(ужез мырк)
А.(визьтэм мурт азьтэмскоз)
5. Антонимъёс озьы ик пумиськыло загадкаосын-мадиськонъёсын:
- Муэз тӧдьы, кидысэз сьӧд. Ма со? (Гожъям бумага)
- Вылласянь понод, улласянь виялоз. (Воронка)
- Кыдёкын ке но со, матын кылӥське. (Телефон пыр куара)
Будэтэ на асьтэлэсь малпам мадиськонъёстэс.
«Куддыръя» кырӟанысь шедьтоно антонимъёсты:
Куддыръя мылкыдыд
Шунды кадь ик лякыт.
Куддыръя нош луэ
Сьӧд уй кадь ик секыт.
Куддыръя сюлэмыд
Тыл эгыр кадь ӟырдыт,
Куддыръя нош луэ
Лымы кадь ик кезьыт.
Куддыръя кылъёсыд
Буртчин кадь ик небыт,
Куддыръя нош луэ
Боды кадь ик чурыт.
Куддыръя тон туж ӟеч,
Куддыръя нош туж лек,
Куддыръя – кылдысин,
Куддыръя тон – ведӥн.
Куддыръя кылыныд
Тон бурдо кариськод,
Куддыръя мынэсьтым
Осконме быдтӥськод.
(Ашальчи Оки, 1923)
Быдэстэ тестэз:
1). Лексика – со:
а) вераськон люкет
б) вераськон кылэ пырись ваньмыз кылъёс
в) вераськон куараос
г) кылэз шонер гожтон
2). Кудӥз кыл трос значениен луэ:
а) йыр б) ю бусы в) школа г) гурт
3). Омонимъёс – со:
а) туссыя огкадесь, нош валатонзыя пӧртэмесь кылъёс
б) туссыя пӧртэмесь, нош пуштроссыя огкадесь кылъёс
4). Та кылъёс омонимъёс луо:
а) кема возьмало, кема витё
б) пась кисы, пась ӟеп
в) пальтозэ кылиз, со бере кылиз
г) уно коньдон, трос коньдон
5). Та кылъёс синонимъёс луо:
а) ӟезьы – капка
б) пуштрес – гонтэм
в) сьӧд – тӧдьы
г) чаляк – кален
6). Та кылъёс антонимъёс луо:
а) сьӧд – тӧдьы
б) мыныны – ветлыны
в) пичи – лапег
г) секыт – шуг
7). Та предложениын кыл переносной значениен кутэмын:
а) Писпуос баблес бус пӧлы ышизы.
б) Пиналъёс тулыс но сӥзьыл писпу мертто.
8). Та кыл сочетаниын «син» кыл кутэмын прямой значениен:
а) укно син
б) сьӧд син
в) ошмес син
г) картофка син
9). «Чеберске» кыллэн грамматической значениез луэ:
а) будэ, чебер луэ
б) глагол, али дырын, 3-тӥ лицоын, одӥг лыдын
10. Кыллэсь шонер гожтӥськемзэ учконо:
а) фразеологической словарьысь
б) биологической словарьысь
в) орфографической словарьысь
Уроклы йылпумъян, рефлексия:
- Ма сярысь туннэ урокын тодӥмы? Пуктэм азьмугъёсмес быдэстӥм-а? Азьланьтэ сётэм предложениосты:
- Мон тодӥ…
- Мон пайми…
- Мон дорын верало…
- Мынам эшшо тодэме потэ…
- Кыӵе вераськон люкетъёс антонимъёс кылдыто? Кыӵеосыз уг кылдыто?
Гуртэ уж:
Антонимлы синквейн кылдытоно.
2 252
32 539 
